پاکستان: فضائی آلودگی ، سالانہ ایک لاکھ 35 ہزار اموات،اوسط عمر میں کمی کا بھی انکشاف

اسلام آباد: ملک میں فضائی آلودگی انسانی زندگیوں کے لیے سنگین خطرہ بن گئی ہے، جہاں ہر سال تقریباً ایک لاکھ پینتیس ہزار افراد قبل از وقت موت کا شکار ہو رہے ہیں۔

وفاقی وزیر برائے موسمیاتی تبدیلی نے قومی اسمبلی کو آگاہ کیا ہے کہ زہریلی ہوا اور اسموگ کے باعث پاکستانیوں کی اوسط عمر میں دو سال اور سات ماہ تک کی کمی واقع ہو رہی ہے۔

قومی اسمبلی میں جمع کرائے گئے تحریری جواب کے مطابق باریک زہریلے ذرات، جنہیں پی ایم ٹو پوائنٹ فائیو کہا جاتا ہے، انسانی صحت کے لیے سب سے بڑا خطرہ بن چکے ہیں، جو دل، پھیپھڑوں اور سانس کی بیماریوں میں اضافے کا سبب بن رہے ہیں۔

رپورٹ میں لاہور اور اس کے گرد و نواح کو شدید اسموگ اور خطرناک فضائی آلودگی والے علاقوں میں شامل کرتے ہوئے اسے ایک سنگین صحتِ عامہ کا مسئلہ قرار دیا گیا ہے، جہاں سردیوں میں صورتحال مزید خراب ہو جاتی ہے۔