ترک نائب صدر کی یوم آزادی پاکستان کی تقریب میں شرکت، لازوال محبت کا اظہار

ترکیہ کے دارالحکومت انقرہ میں پاکستان کا 79واں یومِ آزادی انتہائی جوش و خروش، وقار اور روایتی جذبے کے ساتھ منایا گیا۔ انقرہ کے ‘پاکستان ہاؤس’ کے وسیع و عریض احاطے میں منعقدہ اس شاندار تقریب میں ترکیہ کے نائب صدر جودت یلماز نے بطور مہمانِ خصوصی شرکت کی۔ تقریب میں ترکیہ کی اعلیٰ ترین ملٹری و سویلین قیادت کی بھرپور موجودگی دونوں برادر ممالک کے درمیان گہری محبت، یکجہتی اور تاریخی و برادرانہ تعلقات کے عروج کو واضح کرتی ہے۔

تقریب میں ترکیہ کے وزیرِ قومی دفاع یاشار گولر، چیف آف جنرل اسٹاف جنرل سیلچوق بایراکتار اولو، بحری کمانڈر ایڈمرل ارجمند طاطلی اولو، بری فوج کے کمانڈر جنرل متین توکل، فضائیہ کے کمانڈر جنرل ضیا جمال قادی اولو، سابق نائب وزیراعظم بلند آرنچ سمیت متعدد سفراء، پاکستانی کمیونٹی اور میڈیا کے نمائندوں نے شرکت کی۔ تقریب کا آغاز تلاوتِ کلامِ پاک سے ہوا، جس کے بعد دونوں ممالک کے قومی ترانے بجائے گئے۔ اس موقع پر پاکستان ایمبیسی اسکول کے بچوں نے ملی نغمے اور ثقافتی رقص پیش کیا جبکہ پاکستان کے قدرتی حسن، تاریخ اور اقتصادی ترقی پر مبنی خصوصی دستاویزی فلم بھی دکھائی گئی۔ تقریب سے خطاب کرتے ہوئے ترک نائب صدر جودت یلماز نے کہا کہ پاک ترک تعلقات محض رواجی سفارت کاری نہیں بلکہ ایک اٹوٹ برادرانہ رشتہ ہیں۔