عالمی فٹبال کی ترقی کیلئے 10 ارب سے زائد کی فنڈنگ، نئی کمپنی بنانے کی تجویز

عالمی فٹبال کی ترقی و فروغ کے لیے 10 ارب ڈالر سے زائد فنڈنگ کا ایک بڑا منصوبہ تیار کر لیا گیا ہے، جبکہ فیفا ورلڈ کپ اور دیگر اہم ٹورنامنٹس کی دیکھ بھال اور انتظامی امور کے لیے ایک نئی کمپنی قائم کرنے کی تجویز بھی زیرِ غور ہے۔ خبر ایجنسی کے مطابق، منصوبے کے تحت نئی کمپنی کے اقلیتی حصص (Minority Shares) فروخت کر کے تقریباً 4.2 ارب ڈالر جمع کرنے کا ہدف مقرر کیا گیا ہے۔ اس کے ساتھ ہی فیفا کے رکن ممالک کے لیے سالانہ فنڈنگ 80 لاکھ ڈالر سے بڑھا کر 2 کروڑ ڈالر تک کرنے کی تجویز بھی دی گئی ہے۔

ذرائع کے مطابق نئی بننے والی کمپنی سے حاصل ہونے والا تمام تر منافع دنیا بھر میں فٹبال کی بہتری اور ترقیاتی منصوبوں پر خرچ کیا جائے گا۔ تاہم، اس اہم اور جامع منصوبے پر عملدرآمد کو فیفا کونسل اور تمام رکن ممالک کی اکثریت کی باضابطہ منظوری سے مشروط کیا گیا ہے۔