آبنائے ہرمز کے انتظام سے متعلق ایران سے مذاکرات مثبت رہے، عمانی وزارت خارجہ

عمانی وزارت خارجہ نے ایک بیان جاری کرتے ہوئے کہا ہے کہ آبنائے ہرمز کے انتظام اور بحری امور سے متعلق ایران کے ساتھ ہونے والے حالیہ مذاکرات مثبت اور تعمیری رہے ہیں۔ تاہم عمانی وزارت خارجہ نے اپنے بیان میں ایران کا نام لیے بغیر آبنائے ہرمز سے گزرنے والے تجارتی و بحری جہازوں پر ہونے والے حملوں کی شدید مذمت کی اور خطے میں کشیدگی سے گریز کرتے ہوئے بات چیت کے عمل کو آگے بڑھانے کی ضرورت پر زور دیا۔

بیان میں مزید کہا گیا کہ آبنائے ہرمز میں جہاز رانی کے مناسب طریقہ کار اور نظم و ضبط پر مذاکرات کا سلسلہ جاری ہے، اور اس اہم بحری راہداری میں امن و امان برقرار رکھنا تمام فریقین کے مفاد میں ہے۔ عمان نے زور دیا کہ تمام متعلقہ فریق ایسے کسی بھی اقدام یا اشتعال انگیزی سے مکمل طور پر گریز کریں جو ان مذاکراتی کوششوں اور حاصل ہونے والی پیشرفت کو خطرے میں ڈالنے کا باعث بن سکے۔