نیویارک شہر کی انتظامیہ نیتن یاہو کو گرفتار نہیں کر سکتی، وفاق سے گرفتاری کا مطالبہ,ظہران ممدانی

نیویارک کے میئر ظہران ممدانی نے امریکی حکومت سے مطالبہ کیا ہے کہ وہ عالمی فوجداری عدالت (ICC) کے وارنٹِ گرفتاری پر عملدرآمد کرتے ہوئے اسرائیلی وزیراعظم بنیامین نیتن یاہو کو فوری طور پر گرفتار کرے۔ اپنے ایک بیان میں میئر نیویارک نے نیتن یاہو کو جنگی جرائم اور ہزاروں بچوں سمیت 73 ہزار سے زائد فلسطینیوں کی نسل کشی کا ذمہ دار ٹھہرایا۔ انہوں نے واضح کیا کہ اگرچہ نیویارک سٹی انتظامیہ کے پاس براہِ راست نیتن یاہو کو گرفتار کرنے کا قانونی اختیار نہیں، لیکن امریکی وفاقی حکومت کے پاس آئی سی سی وارنٹ پر عمل درآمد کرنے کا مکمل اختیار موجود ہے۔ ظہران ممدانی نے اعلان کیا کہ اگر نیتن یاہو یا جنگی جرائم میں ملوث دیگر ملزمان امریکا آئیں تو انہیں گرفتار کیا جائے، اور نیویارک سٹی میں ان کا کوئی استقبال نہیں کیا جائے گا۔