نیویارک: نقاب پوش ڈکیت نے کیب ڈرائیور کے چہرے پر گولی مار دی، پولیس کی ملزم کی تلاش میں چھاپے

امریکی شہر نیویارک کے علاقے بروکپین میں مسلح ڈکیتی کے دوران ایک نقاب پوش ملزم نے 21 سالہ ٹیکسی ڈرائیور کو چہرے پر گولی مار دی اور نقدی لوٹ کر فرار ہو گیا۔ نیویارک پولیس کے مطابق یہ واقعہ ہفتے کی صبح تقریباً چار بجے پیش آیا، جب ملزم نے ایک ٹی ایل سی لائسنس یافتہ کیب کو نشانہ بنایا۔

پولیس حکام نے بتایا کہ مسلح ملزم گاڑی میں سوار ہوا اور ڈرائیور کو دھمکا کر پیسے اور گاڑی کی چابیاں مانگیں۔ جیسے ہی 21 سالہ ڈرائیور نے گاڑی سے باہر نکلنے کی کوشش کی، ملزم نے فائرنگ کر دی جس کے نتیجے میں گولی ڈرائیور کے چہرے پر لگی۔ ملزم گاڑی سے غیر معلوم رقم لوٹنے کے بعد پیدل فرار ہو گیا۔

اطلاع ملتے ہی ہنگامی طبی عملہ (EMS) موقع پر پہنچ گیا اور زخمی ڈرائیور کو مقامی ہسپتال منتقل کیا جہاں اس کی حالت مستحکم بتائی جاتی ہے۔ پولیس کا کہنا ہے کہ خوش قسمتی سے یہ فائرنگ جان لیوا ثابت نہیں ہوئی۔

نیویارک پولیس (NYPD) نے ملزم کا خاکہ اور معلومات عام کرتے ہوئے عوام سے مدد کی اپیل کی ہے۔ پولیس کے مطابق ملزم نے نیلی شارٹس، سیاہ سویٹ شرٹ، سیاہ سرجیکل ماسک اور سیاہ جوتے پہن رکھے تھے اور اس کے پاس ایک سیاہ بیک پیک بھی تھا۔ پولیس نے شہریوں سے اپیل کی ہے کہ ملزم سے متعلق کسی بھی قسم کی معلومات رکھنے والے افراد کرائم اسٹاپرز ہاٹ لائن پر رابطہ کریں