شمال مشرقی امریکا میں برفانی طوفان کی تباہ کاری، رہوڈ آئی لینڈ میں 3 فٹ برفباری، کئی دہائیوں کا ریکارڈ ٹوٹ گیا

شمال مشرقی امریکا میں آنے والے طاقتور برفانی طوفان نے نظام زندگی مفلوج کر دیا،تیز ہواؤں اور برفباری سے لاکھوں افراد بجلی سے محروم ہیں۔امریکی میڈیا کےمطابق ریاست رہوڈ آئی لینڈ میں 3 فٹ سے زائد برفباری ریکارڈ کی گئی، جس نے کئی دہائیوں کا ریکارڈ توڑ دیا۔اسی طرح نیویارک سٹی کے معروف مقام سینٹرل پارک میں تقریباً بیس انچ برف ریکارڈ کی گئی، جس کے باعث سڑکیں، پارکس اور رہائشی علاقے مکمل طور پر برف میں ڈھک گئے۔ریاست میساچوسٹس میں شدید برفانی طوفان کے باعث ہنگامی حالت نافذ کردی گئی جبکہ شہریوں کو غیر ضروری سفر سے گریز کی ہدایت کی گئی ہے۔ایوی ایشن حکام کے مطابق ملک بھر میں پانچ ہزار چھ سو سے زائد پروازیں منسوخ کردی گئی ہیں جبکہ متعدد ہوائی اڈوں پر فلائٹ آپریشن شدید متاثر ہوا ہے۔حکام نے خبردار کیا کہ برفباری اور شدید سردی کا سلسلہ آئندہ چند روز تک جاری رہ سکتا ہے، جس سے مزید سفری مشکلات اور نظام زندگی متاثر ہونے کا خدشہ ہے۔