اسرائیلی وزیراعظم نیتن یاہو کی پارٹی کا بل بورڈ: نیویارک کے میئر زہران ممدانی کی تصویر ایران اور حزب اللہ رہنماؤں کے ساتھ لگا دی

اسرائیل کے وزیراعظم بن یامین نیتن یاہو کی دائیں بازو کی لیکوڈ پارٹی نے تل ابیب میں ایک انتخابی بل بورڈ آویزاں کیا ہے جس میں نیویارک کے میئر زہران ممدانی کو ایران کے سپریم لیڈر مجتبیٰ خامنہ ای، حزب اللہ کے سربراہ نعیم قاسم اور ترک صدر رجب طیب اردگان کے ساتھ دکھایا گیا ہے۔ بل بورڈ پر تحریر ہے کہ “یہ چاہتے ہیں کہ نیتن یاہو ہار جائیں… انہیں جیتنے نہ دیں”۔ جولائی میں کینسیٹ (اسرائیلی پارلیمنٹ) کی تحلیل کے بعد اکتوبر میں ہونے والے عام انتخابات کے پیشِ نظر نیتن یاہو نے انتخابی مہم تیز کر دی ہے۔ یاد رہے کہ دونوں رہنماؤں کے درمیان لفظی جنگ اس وقت شدت اختیار کر گئی تھی جب ممدانی نے نیتن یاہو کو “جنگی مجرم” قرار دیتے ہوئے کہا تھا کہ ان کی جگہ دی ہیگ میں عالمی عدالت میں ہے۔ ممدانی نے ستمبر میں اقوامِ متحدہ کے اجلاس میں شرکت کے لیے آنے پر نیتن یاہو کی گرفتاری کا بھی مطالبہ کیا تھا۔