ٹرانسپورٹرز اور پنجاب حکومت کے مذاکرات کامیاب، ہڑتال ختم

پنجاب حکومت اور ٹرانسپورٹرز کے درمیان مذاکرات کامیاب ہو گئے، جس کے بعد ٹرانسپورٹرز نے فوری طور پر ہڑتال ختم کرنے کا اعلان کر دیا ہے۔ مذاکرات سینیئر صوبائی وزیر مریم اورنگزیب اور ٹرانسپورٹر تنظیموں کے نمائندوں کے درمیان ہوئے جن میں ہڑتال ختم کرنے پر اتفاق کیا گیا۔

وزیراعلیٰ پنجاب مریم نواز شریف نے ٹرانسپورٹرز کے مسائل کے حل کے لیے ایک کمیٹی تشکیل دے دی ہے۔ یہ کمیٹی سینیئر صوبائی وزیر مریم اورنگزیب کی سربراہی میں کام کرے گی، جبکہ اس میں ٹرانسپورٹرز کے نمائندے بھی شامل ہوں گے۔ کمیٹی کا پہلا اجلاس ہفتہ کے روز منعقد ہوگا۔پاکستان گڈز ٹرانسپورٹ الائنس کے مرکزی صدر حاجی شیر علی چوہدری سمیت دیگر عہدیداروں نے مذاکرات کے بعد مصالحتی قرارداد پر دستخط کر دیے۔ مریم اورنگزیب نے ٹرانسپورٹرز کے فیصلے کا خیرمقدم کرتے ہوئے کہا کہ مسائل کو افہام و تفہیم سے حل کیا جائے گا۔ ان کا کہنا تھا کہ حکومت کا مقصد انسانی زندگی کا تحفظ اور تمام شہریوں کے لیے بہتر حالات یقینی بنانا ہے۔مذاکرات کے عمل میں ٹرانسپورٹرز کے دیگر نمائندے محمد ریاض خان تاجک، چوہدری مقبول حسین، رانا طارق مشتاق، ملک اعجاز، ملک معروف، سیف شاہ دین گجر، فیصل بشیر بھٹی، ملک جاوید اور حاجی پرویز اعوان بھی شریک تھے۔