امریکا اور یورپ کو اپنی مشترکہ سلامتی کیلئے متحد رہنا ہوگا: نیٹو سربراہ

سربراہ نیٹو جنرل مارک روٹے نے امریکا اور یورپی ممالک کے درمیان مضبوط روابط پر زور دیتے ہوئے کہا ہے کہ امریکا اور یورپ کو اپنی مشترکہ سلامتی اور بدلتے ہوئے عالمی حالات کے تناظر میں متحد رہنا ہوگا۔واشنگٹن کے معروف تھنک ٹینک “اٹلانٹک کونسل” میں اہم خطاب کرتے ہوئے سربراہ نیٹو جنرل مارک روٹے کا کہنا تھا کہ یورپ کا دفاع درحقیقت امریکا کے اپنے دفاع اور تزویراتی مفادات سے جڑا ہوا ہے، اس لیے یورپ اور امریکا کے مابین قریبی اور فعال تعاون وقت کی اہم ضرورت ہے۔ انہوں نے واضح کیا کہ اگرچہ یورپ اب دفاعی امور میں خود پر انحصار بڑھا رہا ہے، لیکن اس کے باوجود امریکا ہمیشہ نیٹو (شمالی اوقیانوس کے معاہدے کی تنظیم) اتحاد کا مرکزی ستون رہے گا۔

خارجہ امور اور علاقائی سکیورٹی پر بات کرتے ہوئے جنرل مارک روٹے نے ایران کے معاملے پر سخت موقف اختیار کیا۔ انہوں نے کہا کہ ایران کو کسی بھی قیمت پر جوہری ہتھیار حاصل کرنے کی اجازت نہیں دی جائے گی۔ نیٹو چیف کا کہنا تھا کہ حالیہ امریکی کارروائی نے ایران کے جوہری اور بیلسٹک میزائل پروگرام کو شدید نقصان پہنچایا ہے، تاہم خطے میں پائیدار امن کے لیے ایران کے جوہری پروگرام سے متعلق مسلسل چوکنا اور باخبر رہنا انتہائی ضروری ہے