دوبارہ اقتدار میں آیا تو قطر کو دشمن ریاست قرار دوں گا: نفتالی بینیٹ

اسرائیل کے سابق وزیراعظم نفتالی بینیٹ نے اعلان کیا ہے کہ اگر وہ دوبارہ اقتدار میں آئے تو قطر کو فوری طور پر باقاعدہ “دشمن ریاست” قرار دیں گے۔ اپنے ایک بیان میں نفتالی بینیٹ نے الزام عائد کیا کہ ان کی وزراتِ عظمیٰ کے دور میں ملنے والی انٹیلی جنس اطلاعات کے مطابق قطر حماس اور ایرانی پاسدارانِ انقلاب کی مالی معاونت کر رہا تھا۔ انہوں نے دعویٰ کیا کہ قطر نے امریکی یونیورسٹیوں میں نوجوانوں کو متاثر کرنے کے لیے اربوں ڈالر کی سرمایہ کاری کی، جس سے وہاں “فرام دی ریور ٹو دی سی” جیسے اسرائیل مخالف نعروں اور نظریات کو فروغ ملا۔ 2021 سے 2022 تک وزیراعظم رہنے والے نفتالی بینیٹ کا کہنا تھا کہ قطر کا اثر و رسوخ اسرائیلی وزیراعظم کے دفتر تک پہنچ چکا ہے، جس کا واحد مقصد اسرائیل کو نقصان پہنچانا ہے، لہٰذا وہ اقتدار میں واپسی پر قطر کے خلاف سخت ترین قانونی و سفارتی موقف اختیار کریں گے۔