پاکستان امن کا علمبردار، دفاعی معاہدہ سے خطے میں امن آئے گا: مصدق ملک

وفاقی وزیر مصدق ملک نے کہا ہے کہ پاکستان ہمیشہ سے عالمی امن کا علمبردار رہا ہے اور حالیہ دفاعی معاہدوں کے باعث نہ صرف خطے میں پائیدار امن آئے گا بلکہ دنیا بھی ان اقدامات کو امن معاہدوں کی نظر سے دیکھ رہی ہے۔

مصدق ملک کا کہنا تھا کہ امن کے خواہش مند دیگر ممالک بھی آہستہ آہستہ اس قائم کردہ سٹریٹجک فریم ورک کا حصہ بنیں گے۔ انہوں نے ماضی کا موازنہ کرتے ہوئے کہا کہ پی ڈی ایم حکومت کی آمد سے پہلے ہر ملک پاکستان سے نالاں اور ناراض تھا، جبکہ آج عالمی سطح پر صورتحال بالکل بدل چکی ہے اور دنیا بھر میں پاکستان کے وزیراعظم اور فیلڈ مارشل کا ریڈ کارپٹ استقبال کیا جا رہا ہے۔ انہوں نے مثال دیتے ہوئے کہا کہ امریکی، ایرانی اور سعودی وزرائے خارجہ پاکستان کی حکمتِ عملی کی کھلے عام تعریف کر رہے ہیں۔

وفاقی وزیر نے ملک کی معرکہ آرائی کا ذکر کرتے ہوئے کہا کہ حالیہ جنگ کے دوران بھارت کو سخت خفت اور منہ کی کھانی پڑی۔ ان کا کہنا تھا کہ پاکستان نے اپنے سے 7 گنا بڑی عسکری طاقت کو شکست فاش دی، اور اللہ تعالیٰ نے ملک کی سیاسی و عسکری قیادت یعنی وزیراعظم اور فیلڈ مارشل کو اس تاریخی امتحان میں عظیم کامیابی سے ہمکنار کیا۔