صوبوں کا معاملہ آئین کے تحت پارلیمان میں حل کیا جائے: مرتضیٰ وہاب

میئر کراچی مرتضیٰ وہاب نے واضح کیا ہے کہ ملک میں نئے صوبوں کی تشکیل کا معاملہ آئین کے دائرہ کار میں رہتے ہوئے صرف پارلیمان کے ذریعے ہی حل ہو سکتا ہے، محض سیاسی شوشے چھوڑنے سے مسائل کا حل ممکن نہیں۔ میڈیا سے گفتگو کرتے ہوئے انہوں نے کہا کہ جب تک ملک میں سیاسی استحکام نہیں آئے گا، تب تک معاشی استحکام کا خواب پورا نہیں ہو سکتا۔ ان کا کہنا تھا کہ پاکستان پیپلز پارٹی نے ہمیشہ جمہوری طرزِ عمل اور آئینی راستہ اختیار کیا ہے، جبکہ ایم کیو ایم چائنہ کٹنگ میں مہارت رکھتی ہے اور اسے کراچی کے خلاف منفی پراپیگنڈا بند کر دینا چاہیے۔

مرتضیٰ وہاب نے اعلان کیا کہ پیپلز پارٹی شہر کی رونقیں بحال کرنے کے لیے پرعزم ہے اور کراچی کی 155 نئی سڑکوں پر جلد تعمیری کام کا آغاز کیا جا رہا ہے، جبکہ سڑکیں بلاک کر کے عوام کو پریشان کرنا مناسب عمل نہیں ہے۔ میر رضا کیس پر بات کرتے ہوئے انہوں نے کہا کہ واقعہ قتل ہے یا خودکشی، یہ بات شفاف تحقیقات سے جلد واضح ہو جائے گی اور متاثرہ خاندان کو مطمئن کرنا حکومت کی اولین ذمہ داری ہے۔ علاوہ ازیں، میئر کراچی نے لانڈھی میں کے ایم سی (KMC) اسپورٹس کمپلیکس کا باقاعدہ افتتاح بھی کیا تاکہ شہریوں کو کھیل کی بہترین سہولیات میسر آ سکیں۔