ایم کیو ایم کا نئے صوبے کے لیے عوامی رابطہ مہم اور عدالت جانے کا اعلان

کراچی: ایم کیو ایم پاکستان نے نئے صوبے کے قیام اور بلدیاتی اداروں کی مضبوطی کے لیے عوامی رابطہ مہم چلانے اور عدالت جانے کا اعلان کر دیا ہے۔

کراچی میں پریس کانفرنس کرتے ہوئے چیئرمین خالد مقبول صدیقی نے کہا کہ اگر ایوان اور عدالتیں انصاف فراہم نہیں کریں گی تو پارٹی سڑکوں پر عوام سے بات کرے گی، کیونکہ کراچی پر 17 سال سے جاری قبضہ ختم ہونا چاہیے۔

خالد مقبول نے کہا کہ پاکستان میں جمہوریت جاگیردارانہ نظام کے تحت چل رہی ہے، اور صوبے کا انتظامی دائرہ آبادی کے مطابق بڑھنا چاہیے۔ ان کا کہنا تھا کہ یہ ایم کیو ایم کا مطالبہ نہیں، بلکہ آئین کا تقاضہ ہے۔

چیئرمین ایم کیو ایم نے مزید کہا کہ کراچی کے ماسٹر پلان کو کرپشن میں بدلا جا رہا ہے، اور آئین کہتا ہے کہ بلدیاتی حکومتیں قائم ہونی چاہئیں تاکہ عوام کو ان کے آئینی حقوق مل سکیں۔ انہوں نے بتایا کہ آج ایوان میں ایک جماعت کے سوا تمام جماعتیں ان کے موقف کے ساتھ ہیں۔

خالد مقبول صدیقی نے کہا کہ ایم کیو ایم سندھ کے شہری علاقوں کے تمام مسائل پر آواز بلند کرے گی اور قانون کے ذریعے اپنا حق حاصل کرے گی۔ انہوں نے زور دیا کہ 18ویں ترمیم پر مکمل عمل ہونا چاہیے اور سندھ کے شہری علاقوں کے عوام کو آئینی حقوق دیے جائیں۔