مجتبیٰ خامنہ ای نے باقر ذوالقدر کو اپنا سیاسی مشیر مقرر کر دیا

ایران کے سپریم لیڈر آیت اللہ مجتبیٰ خامنہ ای نے پاسدارانِ انقلاب (IRGC) کے سینئر رہنما اور ایکسپیڈیئنسی کونسل کے سابق سیکرٹری محمد باقر ذوالقدر کو اپنا نیا سیاسی مشیر مقرر کر دیا ہے۔ ایرانی سرکاری میڈیا کی رپورٹس کے مطابق سپریم لیڈر کی جانب سے باقر ذوالقدر کی سیاسی و سیکیورٹی امور میں طویل خدمات اور تجربات کو سراہتے ہوئے ان کی تقرری کا باضابطہ نوٹیفکیشن جاری کیا گیا۔

باقر ذوالقدر ایرانی نظامِ حکومت اور عسکری شعبے کی ایک نمایاں شخصیت تصور کیے جاتے ہیں۔ اس سے قبل وہ سپریم نیشنل سیکیورٹی کونسل کے سیکرٹری اور نائب وزیرِ داخلہ برائے سیکیورٹی امور کے طور پر بھی خدمات انجام دے چکے ہیں۔ یاد رہے کہ اس سے قبل ایرانی سپریم لیڈر نے اپنے ایک اور سینئر مشیر اور سابق IRGC سربراہ محسن رضائی کو نئی ذمہ داری سونپتے ہوئے انہیں ایران کی سپریم نیشنل سیکیورٹی کونسل کا باضابطہ نمائندہ مقرر کیا تھا۔ سپریم لیڈر کے دفاتر میں کی جانے والی ان اہم تقرریوں کو ملک کی موجودہ جیو پولیٹیکل صورتحال اور سیکیورٹی حکمتِ عملی کے تناظر میں انتہائی اہمیت کا حامل قرار دیا جا رہا ہے۔