قائداعظم نے ایک ملت کو نظریہ، شعور اور خودمختار ریاست دی: محسن نقوی

اسلام آباد: وفاقی وزیر داخلہ محسن نقوی نے بانیِ پاکستان قائداعظم محمد علی جناحؒ کی عظیم جدوجہد اور بے مثال قیادت کو خراجِ عقیدت پیش کرتے ہوئے کہا ہے کہ قائد اعظم نے ایک بکھری ہوئی ملت کو نظریہ، شعور اور ایک خودمختار ریاست عطا کی۔

اپنے خصوصی پیغام میں وفاقی وزیر داخلہ نے کہا کہ قائداعظم محمد علی جناحؒ کی جدوجہدِ آزادی ہماری قومی تاریخ کا سب سے روشن اور درخشاں باب ہے۔ انہوں نے برصغیر کے مسلمانوں کو سیاسی و اجتماعى غلامی سے نکال کر ایک آزاد اور خود مختار وطن کی منزل تک پہنچایا، جس کے نتیجے میں پاکستان دنیا کے نقشے پر ایک وقیع ریاست کے طور پر ابھرا۔

محسن نقوی نے قائد اعظم کی شخصیت کی خصوصیات کو اجاگر کرتے ہوئے کہا کہ بانیِ پاکستان کے مجسمے میں کردار کی بلندی، گفتار کی سچائی اور عمل کی یکسوئی کا ایسا نادر امتزاج موجود تھا جو تاریخ عالم میں کم ہی نظر آتا ہے۔ شدید علالت اور جسمانی کمزوری کے باوجود ان کے غیر متزلزل عزم اور استقلال نے قوم کو آزادی کی منزل سے ہمکنار کیا۔

انہوں نے مزید کہا کہ قائداعظم اقلیتوں کے حقوق کے سب سے بڑے علمبردار تھے اور وہ ریاست کو عوام کی مقدس امانت تصور کرتے تھے۔ ایمان، اتحاد اور تنظیم ہی قائد اعظم کی اصل امانت ہیں اور یہی اصول پاکستان کی حقیقی روح کی نمائندگی کرتے ہیں۔ وفاقی وزیر کا کہنا تھا کہ آج بھی پاکستان کی ترقی، استحکام اور خوشحالی صرف اور صرف قائداعظم کے سنہری اصولوں پر پیرا ہونے میں مضمر ہے۔