پی ایس ایل 26 مارچ سے ہی شروع ہوگی، افتتاحی تقریب منسوخ کر دی: محسن نقوی

لاہور: چیئرمین پاکستان کرکٹ بورڈ (PCB) محسن نقوی نے ایک اہم پریس کانفرنس کے دوران اعلان کیا ہے کہ موجودہ علاقائی صورتحال اور جنگ کے باعث ‘پاکستان سپر لیگ 11’ کے فارمیٹ میں بڑی تبدیلیاں کی گئی ہیں۔ انہوں نے واضح کیا کہ پی ایس ایل الیون اپنے مقررہ شیڈول کے مطابق 26 مارچ سے ہی شروع ہوگی، تاہم تمام میچز بغیر کراؤڈ (خالی اسٹیڈیم) کے کھیلے جائیں گے اور شائقین کو اسٹیڈیم آنے کی اجازت نہیں ہوگی۔

محسن نقوی کا کہنا تھا کہ وزیراعظم سے مشاورت کے بعد کفایت شعاری مہم کے تحت لیگ کو صرف دو شہروں، لاہور اور کراچی تک محدود کر دیا گیا ہے۔ جنگی حالات کی غیر یقینی صورتحال کے پیشِ نظر افتتاحی تقریب کو بھی منسوخ کر دیا گیا ہے۔ چیئرمین پی سی بی نے زور دے کر کہا کہ “پاکستان کھیلوں کے لیے ایک محفوظ ملک ہے اور سیکیورٹی کا کوئی مسئلہ نہیں ہے، ہمارے ادارے اور انٹیلی جنس بہترین انداز میں الرٹ ہیں”۔

انہوں نے مزید بتایا کہ جن شائقین نے ٹکٹیں خرید لی تھیں، انہیں ان کے پیسے واپس کر دیے جائیں گے۔ پی ایس ایل 11 کا نیا اور مختصر شیڈول جلد جاری کیا جائے گا۔ محسن نقوی نے خطے میں امن کی دعا کرتے ہوئے کہا کہ حالات جلد معمول پر آنے کی امید ہے، لیکن فی الحال احتیاطی تدابیر کے طور پر یہ سخت فیصلے ناگزیر تھے۔