ایران نے پاکستان کو اسلامی دنیا کا عظیم اثاثہ قرار دے دیا

وفاقی وزیر داخلہ محسن نقوی نے تہران میں ایرانی سپریم نیشنل سیکیورٹی کونسل کے سیکرٹری محسن رضائی سے ملاقات کی ہے، جس میں باہمی تعلقات اور علاقائی و عالمی صورتحال پر تفصیلی تبادلہ خیال کیا گیا۔ ملاقات کے دوران سیکرٹری محسن رضائی نے کہا کہ ایران اور پاکستان ایک دوسرے کے اسٹریٹجک معاون ہیں، جبکہ پاکستان کی حکومت، افواج اور غیور عوام اسلامی دنیا کے لیے ایک عظیم اور بے مثال اثاثہ ہیں۔

ایرانی سپریم نیشنل سیکیورٹی کونسل کے سیکرٹری نے علاقائی معاملات اور عالمی سطح پر پاکستان کے وزیراعظم اور آرمی چیف کے بڑھتے ہوئے فعال کردار اور سفارتی تحرک کا خیرمقدم کیا۔ انہوں نے کہا کہ ایران، پاکستان، ترکیہ، سعودی عرب، مصر اور انڈونیشیا جیسے بڑے اور بااثر مسلم ممالک کی یہ بنیادی ذمہ داری ہے کہ وہ امت مسلمہ کے اتحاد اور یکجہتی کے فروغ کے لیے مل کر کام کریں۔ ان کا کہنا تھا کہ دونوں ملکوں کے عوام کے درمیان جو باہمی محبت اور اپنائیت پائی جاتی ہے، وہ دنیا میں بے مثال ہے۔

اس موقع پر وفاقی وزیر داخلہ محسن نقوی نے ایران کی حمایت اور جذبہ خیر سگالی کا شکریہ ادا کرتے ہوئے کہا کہ گزشتہ چند ماہ کے دوران پاکستان اور ایران کے دوطرفہ تعلقات میں غیر معمولی پیش رفت ہوئی ہے اور یہ پہلے سے کہیں زیادہ مضبوط و مستحکم ہوئے ہیں۔ انہوں نے اعادہ کیا کہ پاکستان برادر اسلامی ملک ایران کے ساتھ مختلف شعبوں میں تعاون کو مزید وسیع کرنے کے لیے پرعزم ہے۔