محسن نقوی سے چینی قونصل جنرل ژاو شیرین کی ملاقات، پاک چین دوستی پر خراجِ تحسین

لاہور میں وفاقی وزیر داخلہ اور چیئرمین پاکستان کرکٹ بورڈ محسن نقوی سے چین کے قونصل جنرل ژاو شیرین نے ملاقات کی۔
ملاقات کے دوران محسن نقوی نے ژاو شیرین کی بطور چینی قونصل جنرل خدمات کو سراہتے ہوئے ان کے لیے نیک تمناؤں کا اظہار کیا۔

چینی قونصل جنرل ژاو شیرین نے محسن نقوی کی کارکردگی کو غیر معمولی قرار دیتے ہوئے کہا کہ سب آپ کی حیرت انگیز رفتار اور مؤثر فیصلوں کے معترف ہیں۔
انہوں نے کہا کہ پہلے بطور وزیر اعلیٰ پنجاب اور اب وزیر داخلہ کی حیثیت سے محسن نقوی نے پاک چین دوطرفہ تعلقات کو مضبوط بنانے میں گراں قدر کردار ادا کیا۔

ژاو شیرین کا کہنا تھا کہ پاکستان میں ان کا قیام انتہائی خوشگوار رہا اور یہاں کی یادیں ہمیشہ ساتھ رہیں گی۔
اس موقع پر محسن نقوی نے کہا کہ آپ سے بھائیوں جیسا تعلق ہے جو آئندہ بھی برقرار رہے گا، لاہور میں آپ کی کمی ہمیشہ محسوس کی جائے گی۔

محسن نقوی نے حالیہ دورہ چین کا حوالہ دیتے ہوئے بتایا کہ چینی وزیر پبلک سیکیورٹی وانگ ژاو ہونگ سے ساڑھے تین گھنٹے کی طویل ملاقات نہایت خوشگوار اور سودمند رہی، مشترکہ مفادات کے شعبوں میں تعلقات مزید آگے بڑھ رہے ہیں۔
انہوں نے کہا کہ ستمبر میں دوبارہ چین کا دورہ کروں گا اور اپنے بھائی سے ملاقات ہوگی۔

ملاقات کے اختتام پر محسن نقوی نے چینی قونصل جنرل کو کھلاڑیوں کے دستخط شدہ بیٹ کا تحفہ دیا جبکہ ژاو شیرین نے محسن نقوی کو چینی صدر شی جن پنگ کی کتاب پیش کی۔