محسن نقوی سے چین اور ترکیہ سے تربیت یافتہ اے ایس پیز کی ملاقات

وفاقی وزیر داخلہ محسن نقوی سے چین اور ترکیہ سے جدید تربیتی کورسز مکمل کر کے واپس آنے والے اسسٹنٹ سپرنٹنڈنٹس آف پولیس (اے ایس پیز) نے ملاقات کی۔ ملاقات کے دوران پولیس افسران نے چین اور ترکیہ میں جدید پولیسنگ، سرویلنس سسٹمز، جدید آلات کے استعمال اور امن و امان کے قیام سے متعلق حاصل کردہ اپنے مشاہدات اور تجربات سے وزیر داخلہ کو آگاہ کیا اور ان کورسز کو پیشہ ورانہ صلاحیتوں کے نکھار کے لیے انتہائی مفید قرار دیا۔

اس موقع پر وفاقی وزیر داخلہ محسن نقوی نے غیر ملکی تربیتی پروگرامز کو پولیس کی پیشہ ورانہ تربیت کا مستقل حصہ بنانے کا اعلان کیا۔ انہوں نے بتایا کہ اسلام آباد میں چین کی طرز پر ایک ’لا انفورسمنٹ انویسٹی گیشن سنٹر‘ قائم کرنے کا پائلٹ پراجیکٹ شروع کیا جائے گا، جہاں ڈیٹنشن، انویسٹی گیشن اور سمری ٹرائل کا عمل ایک ہی چھت تلے انجام دیا جائے گا تاکہ معمولی نوعیت کے جرائم کا فوری اور مؤثر تصفیہ ممکن ہو سکے۔

وزیر داخلہ نے مزید کہا کہ جرائم کی روک تھام اور نگرانی کو زیادہ فعال بنانے کے لیے وزارت داخلہ کے ایوی ایشن ونگ میں جدید ڈرونز شامل کیے جائیں گے۔ اس کے علاوہ نیشنل پولیس اکیڈمی میں سپیشلائزڈ انویسٹی گیشن رومز قائم کیے جائیں گے اور انٹیروگیشن (تفتیش) کو بطور ایک سپیشلائزڈ سبجیکٹ نصاب میں شامل کیا جائے گا۔ پولیس اہلکاروں کے لیے آپریشنل ضروریات سے ہم آہنگ نیا یونیفارم بھی متعارف کرایا جائے گا۔ اس اہم ملاقات میں کمانڈنٹ نیشنل پولیس اکیڈمی، ڈی جی ایف آئی اے اور دیگر اعلیٰ حکام بھی موجود تھے۔