ایرانی انفراسٹرکچر پر حملوں کا نتیجہ امریکی حاکمانہ نظام کی تباہی ہوگی، محمد مخبر

ایرانی انفراسٹرکچر پر حملہ امریکی حاکمانہ نظام کی تباہی کا سبب بنے گا: محمد مخبر

ایرانی سپریم لیڈر آیت اللہ مجتبیٰ خامنہ ای کے سینئر مشیر محمد مخبر نے خبردار کیا ہے کہ اگر ایران کے بنیادی ڈھانچے (انفراسٹرکچر) کو نشانہ بنایا گیا تو اس کے بھیانک نتائج صرف خطے تک محدود نہیں رہیں گے بلکہ امریکی حاکمانہ نظام اور مغرب کے قائم کردہ گلوبل آرڈر کی مکمل تباہی پر منتج ہوں گے۔

اپنے ایک اہم بیان میں سینئر مشیر محمد مخبر کا کہنا تھا کہ ایران کے خلاف کسی بھی قسم کی کھلی جارحیت یا انفراسٹرکچر پر حملوں کی صورت میں اس کے اثرات صرف روایت کے مطابق میدانِ جنگ تک محدود نہیں رہیں گے بلکہ اس کا دائرہ کار عالمی سطح پر پھیلے گا۔

انہوں نے مزید کہا کہ مغربی طاقتوں نے گزشتہ اڑھائی سو سال کے عرصے میں جس گلوبل آرڈر کو قائم کیا ہے، ایران پر حملے کی صورت میں وہ نظام مکمل طور پر زمین بوس کر دیا جائے گا۔ محمد مخبر نے متنبہ کیا کہ جب اس حاکمانہ نظام کے بنیادی ستون ٹوٹیں گے تو مغرب کا کوئی کمانڈ سینٹر بچے گا اور نہ ہی ان کی لوٹ مار کے لیے قائم کی گئی بین الاقوامی مارکیٹس محفوظ رہ سکیں گی۔