میر رضا کیس: ابتدائی رپورٹ میں گولی اور تشدد سے متعلق اہم انکشافات

میر رضا قتل کیس کی ابتدائی پوسٹ مارٹم و فارنزک رپورٹ میں اہم انکشافات اور اہم شواہد سامنے آئے ہیں، جن سے کیس کی تفتیش کا رخ بدلنے کا امکان ہے۔

ذرائع کے مطابق رپورٹ میں انکشاف کیا گیا ہے کہ میر رضا کو گولی جسم کے پچھلے حصے سے لگی تھی۔ اس کے علاوہ ابتدائی رپورٹ میں مقتول کے جسم پر تشدد کے نشانات کی موجودگی کی بھی نشاندہی کی گئی ہے، جسے تفتیشی حکام ایک اہم پیش رفت قرار دے رہے ہیں۔

رپورٹ میں پولیس سرجن کی جانب سے اٹھائے گئے تمام 14 سوالات کے جوابات تفصیلاً شامل کر دیے گئے ہیں، جن میں گولی لگنے کی نوعیت اور مبینہ تشدد سے متعلق اہم شواہد بھی موجود ہیں۔ ذرائع کا کہنا ہے کہ اس رپورٹ کی روشنی میں تفتیشی حکام نے تحقیقات کا دائرہ وسیع کرنے کا فیصلہ کیا ہے، جبکہ مختلف زاویوں اور پہلوؤں سے واقعے کا باریک بینی سے جائزہ لیا جا رہا ہے۔ یہ ابتدائی رپورٹ آئندہ کی تفتیش کے لیے بنیادی اور کلیدی اہمیت کی حامل ہوگی۔