میر رضا کیس، نئے تفتیشی افسر کو تحقیقات مکمل کرنے کیلئے 10 روز کی مہلت

کراچی کی جوڈیشل مجسٹریٹ شرقی کی عدالت میں میر رضا قتل و تفتش کیس کی سماعت ہوئی، جس میں کیس کے نئے تفتیشی افسر ڈی ایس پی فرید احمد خان نے جامع تحقیقات مکمل کرنے کے لیے عدالت سے مزید وقت دینے کی باضابطہ استدعا کی، جس پر عدالت نے حتمی رپورٹ جمع کروانے کے لیے 10 روز کی مہلت فراہم کر دی ہے۔

سماعت کے دوران نئے تفتیشی افسر ڈی ایس پی فرید احمد خان نے فاضل عدالت کو آگاہ کیا کہ کیس کی انتہائی شفاف اور ہمہ جہت تحقیقات یقینی بنانے کے لیے محکمہ داخلہ سندھ نے ایک مشترکہ تحقیقاتی ٹیم (جے آئی ٹی) تشکیل دے دی ہے اور واقعے سے متعلق تمام اہم ریکارڈ اور شواہد حاصل کر لیے گئے ہیں۔

تفتیشی افسر نے عدالت کو بتایا کہ اس حساس کیس کی فائل 11 سو (1100) سے زائد صفحات پر مشتمل ہے اور تشکیل شدہ ٹیم کی جانب سے اس تمام ریکارڈ اور شواہد کا باریک بینی سے جائز لیا جا رہا ہے۔ انہوں نے تحریری رپورٹ اور تحقیقات مکمل کرنے کے لیے 14 روز کی مہلت دینے کی استدعا کی تھی، تاہم عدالتی نقطہ نظر کو مدنظر رکھتے ہوئے جوڈیشل مجسٹریٹ نے تفتیشی ٹیم کو 10 روز کے اندر تفصیلی رپورٹ پیش کرنے کا حکم دیا۔