میر رضا کیس میں اہم پیش رفت، ڈی آئی جی ویسٹ جے آئی ٹی کے سربراہ مقرر

کراچی کے مبینہ واقعہ میں ہلاک ہونے والے میر رضا کے ورثا کو انصاف ملنے کی امید روشن ہو گئی ہے اور کیس باقاعدہ قانونی ٹریک پر آ گیا ہے۔ حکومتِ سندھ نے واقعے کی شفاف تحقیقات کے لیے مشترکہ تحقیقاتی ٹیم (JIT) تشکیل دے دی ہے جبکہ ڈاکٹر اسامہ کو عہدے سے معطل کر دیا گیا ہے۔ ڈی آئی جی ویسٹ عرفان بلوچ کو جے آئی ٹی کا سربراہ مقرر کیا گیا ہے۔

محکمہ داخلہ سندھ نے آئی بی، سندھ رینجرز، آئی ایس آئی اور نیشنل سائبر کرائم انویسٹی گیشن ایجنسی (NCCIA) کو خطوط ارسال کرتے ہوئے ہدایت کی ہے کہ وہ 7 روز کے اندر جے آئی ٹی کے لیے اپنے نمائندہ افسران نامزد کریں۔ اس کے علاوہ جوڈیشل کمیشن کی رپورٹ میں نامزد افسران کے کردار کی تفتیش کے لیے ایڈیشنل آئی جی سی ٹی ڈی ذوالفقار علی لاڑک پر مشتمل ایک رکنی کمیٹی بھی قائم کر دی گئی ہے۔

محکمہ داخلہ کی جانب سے آئی جی سندھ کو خط لکھ کر ایس ایچ او فیروز آباد عدیل افضال، سب انسپکٹر شبیر لغاری، ایس ایچ او کامران قریشی اور انسپکٹر غوث کے خلاف معطلی اور تادیبی کارروائی کی ہدایت کی گئی ہے۔ دوسری جانب، وفاقی وزارتِ داخلہ سے درخواست کی گئی ہے کہ وہ کیس میں پولیس افسران کی جانب سے ممکنہ پردہ پوشی اور غفلت کی تحقیقات کے لیے ایف آئی اے کے سینئر افسر کو انکوائری کمیٹی کا سربراہ نامزد کرے۔