رواں مالی سال عوام سے 10 ارب روپے کی اضافی پٹرولیم لیوی وصول

وزارتِ خزانہ کی جانب سے جاری کردہ مالیاتی دستاویزات کے مطابق رواں مالی سال کے پہلے تین ماہ کے دوران عوام سے پٹرولیم لیوی کی مد میں 10 ارب روپے کی اضافی وصولی کی گئی ہے۔

دستاویزات کے مطابق رواں مالی سال کے دوران جولائی سے ستمبر تک پٹرولیم لیوی کی مد میں مجموعی طور پر 381 ارب روپے اکٹھے کیے گئے، جبکہ گزشتہ مالی سال اسی عرصے کے دوران پٹرولیم لیوی کی مد میں 371 ارب روپے جمع ہوئے تھے۔

رپورٹ کے مطابق مالی سال کی پہلی سہ ماہی کے دوران ملک کا پرائمری بیلنس (Primary Balance) جی ڈی پی کا 2.7 فیصد ریکارڈ کیا گیا، جو کہ ہندسوں کی صورت میں 2 ہزار 973 ارب روپے رہا۔ اس دوران قومی قرضوں کی سود ادائیگیوں پر 1 ہزار 700 ارب روپے جبکہ دفاعی اخراجات کی مد میں 495 ارب روپے خرچ کیے گئے۔

وزارتِ خزانہ کی دستاویزات میں مزید انکشاف کیا گیا ہے کہ مذکورہ مدت کے دوران حکومت کی کل آمدن 6 ہزار 3 ارب روپے رہی، جبکہ مجموعی حکومتی اخراجات 4 ہزار 370 ارب روپے ریکارڈ کیے گئے۔