روس، امریکہ اور یوکرین کے درمیان مذاکرات کا اگلا دور جلد متوقع ہے: ترجمان کریملن

روسی صدارتی دفتر کریملن کے ترجمان دمتری پیسکوف (Dmitry Peskov) نے کہا ہے کہ روس، امریکا اور یوکرین کے درمیان سہ فریقی امن مذاکرات کا اگلا دور جلد منعقد ہونے کی توقع ہے، اور اس سلسلے میں امریکی مذاکرات کاروں کے ساتھ ابتدائی بات چیت بھی ہو چکی ہے جس کے بعد ماسکو کو امید ہے کہ مذاکراتی عمل مستقبل قریب میں جاری رہے گا۔

ماسکو میں معمول کی پریس بریفنگ کے دوران مذاکرات کے اگلے مرحلے سے متعلق ایک سوال کے جواب میں کریملن کے ترجمان دمتری پیسکوف نے کہا کہ روس کو قوی توقع ہے کہ یہ مذاکرات جلد ہوں گے۔ انہوں نے مزید وضاحت کی کہ امریکی مذاکرات کاروں کے ساتھ حالیہ رابطوں میں بھی یہی معاملہ زیرِ بحث آیا تھا، اس لیے ماسکو پُرامید ہے کہ سفارتی عمل مستقبل قریب میں مزید آگے بڑھے گا، تاہم انہوں نے مذاکرات کے اگلے دور کی حتمی تاریخ یا مقام کے حوالے سے فی الحال کوئی اعلان نہیں کیا۔

واضح رہے کہ روس، امریکا اور یوکرین کے درمیان سہ فریقی مذاکرات کا گزشتہ دور 10 نومبر کو متحدہ عرب امارات کے دارالحکومت ابوظہبی میں منعقد ہوا تھا۔ ان اہم مذاکرات میں روسی وفد کی قیادت روسی صدر کے معاون ولادیمیر میدنسکی نے کی جبکہ یوکرینی وفد کی سربراہی رستم عمروف نے کی۔ مذاکرات کے آغاز پر امریکی خصوصی نمائندے اسٹیو وٹکوف اور جیرڈ کشنر، یورپ میں نیٹو افواج کے سپریم کمانڈر الیکسس گرنکیوچ اور متحدہ عرب امارات کے وزیرِ خارجہ شیخ عبداللہ بن زاید النہیان بھی مذاکرات کی میز پر موجود تھے، تاہم فرانسیسی حکام کے دعوؤں کے برعکس ابوظہبی میں ہونے والے ان مذاکرات میں یورپی ممالک کے نمائندے شریک نہیں تھے۔

ابوظہبی مذاکرات کے اختتام پر روسی وفد کے سربراہ ولادیمیر میدنسکی نے صحافیوں کو بتایا تھا کہ روس اور یوکرین کے درمیان جنگی قیدیوں کے بڑے پیمانے پر تبادلے پر اصولی اتفاق ہو گیا ہے، جس کی تفصیلات جلد منظرِ عام پر لائی جائیں گی۔ ولادیمیر میدنسکی کے مطابق ابوظہبی مذاکرات میں یوریشیائی خطے کی مجموعی سلامتی کا معاملہ بھی مرکزی اہمیت کا حامل رہا اور فریقین بعض اہم امور پر مشترکہ نکات تک پہنچنے میں کامیاب ہوئے۔