ایران پر حملوں کے بعد فضائی سفر متاثر، 10 ممالک میں تقریباً 14 ہزار پروازیں منسوخ

امریکا اور اسرائیل کی جانب سے ایران پر حملوں کے بعد خطے میں فضائی سفر شدید متاثر ہو گیا ہے اور متعدد ممالک میں ہزاروں پروازیں منسوخ کر دی گئی ہیں۔

فضائی پروازوں کا ریکارڈ رکھنے والے عالمی ادارے کے اعداد و شمار کے مطابق 28 فروری سے اب تک 10 مختلف ممالک کے بڑے ہوائی اڈوں سے روانہ ہونے والی تقریباً 14 ہزار پروازیں منسوخ کی جا چکی ہیں۔

اعداد و شمار سے ظاہر ہوتا ہے کہ خطے میں بڑھتی ہوئی کشیدگی اور سکیورٹی خدشات کے باعث فضائی کمپنیوں نے کئی پروازیں معطل یا منسوخ کرنے کا فیصلہ کیا۔

ماہرین کے مطابق مشرقِ وسطیٰ میں جاری کشیدگی کے باعث متعدد ممالک نے فضائی حدود کے استعمال پر پابندیاں عائد کی ہیں جس کے باعث بین الاقوامی فضائی سفر بری طرح متاثر ہوا ہے۔

تجزیہ کاروں کا کہنا ہے کہ اگر صورتحال مزید کشیدہ ہوئی تو آنے والے دنوں میں فضائی سفر میں مزید خلل پڑ سکتا ہے اور مزید پروازیں منسوخ ہونے کا خدشہ بھی موجود ہے۔