مائیکل جیکسن کی زندگی پر بننے والی پہلی بائیو پِک ریلیز کر دی گئی

معروف لیجنڈ امریکی گلوکار و ڈانسر مائیکل جیکسن کی زندگی پر بننے والی پہلی بائیو پِک ’’مائیکل‘‘ باقاعدہ طور پر ریلیز کر دی گئی ہے۔ اس فلم کی خاص بات یہ ہے کہ اس میں مائیکل جیکسن کا مرکزی کردار ان کے اپنے بھتیجے جیفر جیکسن نبھا رہے ہیں، جنہوں نے اپنی اداکاری اور رقص سے مداحوں کو حیران کر دیا ہے۔

انٹونی فوکوا کی ہدایت کاری میں بننے والی یہ فلم محض موسیقی تک محدود نہیں بلکہ یہ مائیکل جیکسن کی زندگی، ان کی وراثت اور ان کے فنی سفر کی بھرپور عکاسی کرتی ہے۔ فلم میں ‘جیکسن فائیو’ کے دور سے لے کر ان کے دنیا کا سب سے بڑا انٹرٹینر بننے تک کی انتھک جدوجہد اور تخلیقی جنون کو نہایت مہارت سے فلمایا گیا ہے۔

فلم ناظرین کو اسٹیج کی چمک دمک سے ہٹ کر مائیکل کی ذاتی زندگی اور ان کے ابتدائی سولو کیریئر کی یادگار پرفارمنسز کے پسِ پردہ حقائق سے بھی روشناس کرواتی ہے۔ فلم کی جذباتی کہانی اور شاندار میوزک نے 80 اور 90 کی دہائی کے مداحوں کے ساتھ ساتھ نئی نسل کو بھی سحر زدہ کر دیا ہے۔ جیفر جیکسن کے علاوہ فلم کی کاسٹ میں نیا لونگ، لارا ہیریئر اور جولیانا کرو ویلدی جیسے نامور اداکار شامل ہیں، جنہوں نے اپنی جاندار اداکاری سے کہانی میں جان ڈال دی ہے۔