میر رضا کیس: نئے شواہد سامنے، عدالت کا آئندہ سماعت پر رپورٹ پیش کرنیکا حکم

نوجوان تاجر میر رضا کے قتل کیس کی سماعت کے دوران نئے تفتیشی افسر سراج لاشاری عدالت میں پیش ہوئے، جبکہ عدالت نے کیس کی تفتیش میں سست روی اور تاخیر پر شدید تشویش کا اظہار کرتے ہوئے حقائق جلد سامنے لانے کا حکم دیا ہے۔ سماعت کے دوران مدعی مقدمہ میر حسین اپنے وکیل جبران ناصر کے ہمراہ جبکہ مقتول کے بزنس پارٹنر محمد احمد بھی عدالت میں پیش ہوئے۔ تفتیشی افسر نے عدالت کو بتایا کہ 13 اگست کو انویسٹی گیشن ملنے کے بعد اب تک 35 افراد سے پوچھ گچھ کی جا چکی ہے اور وقوعہ کے دن مقتول سے رابطے میں رہنے والے تمام افراد کو شاملِ تفتیش کیا گیا ہے، تاہم ابھی تک کوئی حتمی ملزم سامنے نہیں آیا۔ گواہ محمد احمد کے پولیس تحویل اور تعاون سے متعلق بیانات پر عدالت نے انہیں عبوری ضمانت کے دوران مکمل تعاون، گھر نہ بدلنے اور بغیر بتائے شہر نہ چھوڑنے کی ہدایت دیتے ہوئے ان کی عبوری ضمانت میں 24 اگست تک توسیع کر دی۔

دوسری جانب، کیس کی شفاف تفتیش کے لیے خصوصی تفتیشی کمیٹی میں شاہ لطیف تھانے کے ایس ایچ او اور ایک ڈی ایس پی کو شامل کر کے اراکین کی کل تعداد 9 کر دی گئی ہے۔ مقتول کے اہلخانہ کے تحفظات کے پیشِ نظر کمیٹی نے میر رضا کا موبائل فون اور اسمارٹ واچ این سی سی آئی اے (NCCIA) سے واپس لے کر حتمی فارنزک کے لیے لاہور فارنزک لیبارٹری بھیجنے کا فیصلہ کیا ہے، جبکہ جائے وقوعہ سے مزید اہم شواہد بھی حاصل کر لیے گئے ہیں۔ عدالت نے تفتیشی افسر کی استدعا پر انویسٹی گیشن مکمل کرنے کے لیے 24 اگست تک کی مہلت دیتے ہوئے آئندہ سماعت پر پیشرفت رپورٹ پیش کرنے کا حکم جاری کیا ہے۔