یوکرینی ڈرونز کے روسی علاقوں پر بڑے حملے، 351 ڈرون تباہ، تین بچے ہلاک

روس کے مختلف علاقوں پر رات گئے یوکرین کی جانب سے کیے گئے بڑے پیمانے کے ڈرون حملوں میں کراسنودار کے علاقے میں ڈرون کا ملبہ بچوں کی ایک نجی تنصیب پر گرنے سے 3 بچے ہلاک جبکہ بچوں سمیت متعدد افراد زخمی ہو گئے ہیں۔ دوسری جانب روسی وزارتِ دفاع نے دعویٰ کیا ہے کہ اس کے فضائی دفاعی نظام نے رات بھر میں 351 یوکرینی ڈرونز کو تباہ کیا، جن میں سے صرف روستوف ریجن میں 120 ڈرونز کو نشانہ بنایا گیا۔ حملوں کے دوران روس کی معروف ای کامرس کمپنی ‘اوزون’ کے متعدد لاجسٹک مراکز اور گوداموں کو بھی نشانہ بنایا گیا، جس کے نتیجے میں ادیگیا، ماخاچکالا اور کراسنودار کے گوداموں میں شدید آگ بھڑک اٹھی اور کمپنی کو اپنا آپریشن عارضی طور پر معطل کرنا پڑا۔ ایمرجنسی سروسز متاثرہ علاقوں میں امدادی کارروائیوں اور نقصانات کے تخمینے میں مصروف ہیں۔