ثبوت سامنےلائیں ورنہ عدالت میں گھسیٹوں گی، مریم نواز کا سالک حسین کو ہرجانے کا نوٹس

وزیراعلیٰ پنجاب مریم نواز شریف نے بلاجواز الزامات عائد کرنے پر وفاقی وزیر برائے اوورسیز پاکستانیز و انسانی وسائل چودھری سالک حسین کو قانونی ہرجانے کا نوٹس بھجوا دیا ہے۔

اس سے قبل اٹک میں ایک عوامی تقریب سے خطاب کرتے ہوئے وزیراعلیٰ پنجاب مریم نواز نے سخت ردِعمل دیتے ہوئے کہا تھا کہ اگر چودھری سالک کے پاس ان پر لگائے گئے کرپشن یا بدانتظامی کے الزامات کا کوئی ثبوت ہے تو وہ اسے پبلک کے سامنے لائیں، ورنہ وہ انہیں عدالت میں گھسیٹیں گی۔ انہوں نے کہا کہ چودھری سالک ایک ذمہ دار وفاقی وزیر ہیں، لہٰذا بغیر کسی ثبوت کے الٹے سیدھے الزامات لگانے کے بجائے قانونی شہادتیں پیش کریں، بصورتِ دیگر وہ ان کے خلاف قانونی چارہ جوئی کرتے ہوئے ہرجانے کا نوٹس بھیج رہی ہیں۔

مریم نواز کا مزید کہنا تھا کہ چودھری سالک دعویٰ کرتے ہیں کہ سب سے بہترین حکومت چودھری پرویز الٰہی کی تھی، مگر جب وہ حالیہ بارشوں کے دوران گجرات کا دورہ کرنے گئیں تو وہاں پانی کی صورتحال یہ تھی کہ ان کی اپنی گاڑی ڈوب گئی تھی۔ وزیراعلیٰ نے سوال اٹھایا کہ اگر موجودہ حکومت اتنی ہی کرپٹ ہے تو چودھری سالک وفاقی کابینہ میں وزیر بن کر کیوں بیٹھے ہیں؟ انہوں نے واضح کیا کہ وہ پنجاب میں کسی کی بے جا سفارش نہیں سنتیں اور تمام تر افسران کو محض میرٹ کی بنیاد پر تعینات کرتی ہیں، کیونکہ جو بھی سفارش پر آتا ہے وہ ملک اور عوام کی تباہی کا سبب بنتا ہے۔