وزیراعلیٰ مریم نواز نے مارکیٹیں رات 8 بجے بند کرنے کی تجویز مسترد کردی

وزیراعلیٰ پنجاب مریم نواز شریف نے صوبے بھر میں مارکیٹیں رات 8 بجے بند کرنے کی وفاقی تجویز کو مسترد کرتے ہوئے واضح کیا ہے کہ فی الحال تجارتی مراکز کے اوقاتِ کار تبدیل کرنے کی کوئی ضرورت نہیں ہے۔ پنجاب حکومت کے ذرائع کے مطابق، ایک حالیہ اجلاس کے دوران وزیراعلیٰ نے ہدایت دی کہ پنجاب بھر میں مارکیٹیں رات 10 بجے تک کھلی رہیں گی۔ مریم نواز کا موقف تھا کہ تاجر برادری پہلے ہی معاشی دباؤ کا شکار ہے، اس لیے انہیں مزید مالی مشکلات میں نہیں ڈالا جا سکتا۔ انہوں نے مزید کہا کہ وفاقی اور صوبائی حکومتیں توانائی کے شعبے میں پہلے ہی خاطر خواہ سبسڈی فراہم کر رہی ہیں، لہٰذا اوقاتِ کار میں تبدیلی کا کوئی بھی فیصلہ تاجر تنظیموں اور کاروباری نمائندوں سے تفصیلی مشاورت کے بعد ہی کیا جائے گا۔