ایران معاہدہ کرنے کیلئے منتیں کر رہا ہے، قیمت چکانا پڑے گی: مارکو روبیو

امریکی وزیرِ خارجہ مارکو روبیو نے فلپائن کے دارالحکومت منیلا میں آسیان کانفرنس کے موقع پر صحافیوں سے گفتگو کرتے ہوئے ایران کو سخت خبردار کیا ہے کہ جب تک تہران اپنے طرزِ عمل میں تبدیلی نہیں لاتا، اسے ہر گزرتی رات کے ساتھ مزید بھاری قیمت چکانا پڑے گی۔ مارکو روبیو نے دعویٰ کیا کہ ایران ایک طرف معاہدہ کرنے کی منتیں کر رہا ہے لیکن دوسری جانب ایسا لگتا ہے کہ وہ عملی طور پر کسی معاہدے کے لیے تیار نہیں ہے، اور اگر وہ معاہدہ نہیں کرتا تو اسے اس کے نتائج بھگتنا ہوں گے۔ انہوں نے الزام عائد کیا کہ ایران جب بھی کوئی معاہدہ کرتا ہے تو يا تو اسے توڑ دیتا ہے يا اس کی شرائط تبدیل کر دیتا ہے۔

یمن کی صورتِ حال پر بات کرتے ہوئے امریکی وزیرِ خارجہ کا کہنا تھا کہ حوثیوں کو ایران نے گمراہ کیا ہے اور امید ظاہر کی کہ حوثی باغی کشیدگی میں کمی لائیں گے۔ انہوں نے سعودی عرب کو ایک اہم سٹریٹیجک شراکت دار قرار دیتے ہوئے کہا کہ اس کے ساتھ جوہری معاہدہ کرنا قابلِ فہم ہے، تاہم سعودی عرب یا دیگر ممالک کے ساتھ کسی بھی ایٹمی معاہدے میں حفاظتی اقدامات شامل ہوں گے اور یہ تمام معاہدے امریکی کانگریس کی منظوری سے مشروط ہوں گے۔ مزید برآں، انہوں نے ایشیائی پانیوں میں چینی اقدامات کو پریشان کن قرار دیا اور بتایا کہ ان کی روسی ہم منصب سے بے تکلفانہ گفتگو ہوئی ہے اور امریکہ یوکرین جنگ کے خاتمے کے لیے تعمیری کردار ادا کرنے کے لیے مکمل تیار ہے۔