سکیورٹی پہلے، ملک محفوظ ہوگا تو ترقی بھی ہو گی: سپیکر پنجاب اسمبلی

سپیکر پنجاب اسمبلی ملک محمد احمد خان نے کھڈیاں خاص میں یوتھ کنونشن سے خطاب کرتے ہوئے کہا ہے کہ قومی سلامتی ہر چیز پر مقدم ہے؛ ملک محفوظ ہوگا تو ہی سیاست اور معاشی ترقی ممکن ہو سکے گی۔ انہوں نے ملک میں تعلیمی ایمرجنسی اور صحت کے شعبے میں بہتری کی ضرورت پر زور دیتے ہوئے کہا کہ پاکستان کا سب سے بڑا مسئلہ تعلیم ہے اور پنجاب حکومت اس عزم کے ساتھ کام کر رہی ہے کہ ڈھائی کروڑ سے زائد اسکولوں سے باہر بچوں کو تعلیمی نظام کا حصہ بنایا جائے۔ انہوں نے کھڈیاں کو یونیورسٹی ٹاؤن بنانے کا اعلان کرتے ہوئے بتایا کہ وزیراعلیٰ پنجاب مریم نواز جلد یونیورسٹی کا سنگِ بنیاد رکھیں گی جبکہ وزیراعظم بھی خطے میں موٹروے منصوبے کا افتتاح کریں گے۔

اسپیکر پنجاب اسمبلی نے پاک فوج کی قربانیوں کو خراجِ تحسین پیش کرتے ہوئے کہا کہ 25 کروڑ عوام اور نوجوان سیکیورٹی فورسز کے ساتھ شانہ بشانہ کھڑے ہیں اور افواجِ پاکستان کے خلاف کسی قسم کی سازش یا ہرزہ سرائی برداشت نہیں کی جائے گی۔ انہوں نے واضح کیا کہ دشمن کارروائیوں سے قوم کے حوصلے پست نہیں کر سکتا۔ ملک محمد احمد خان نے کہا کہ نوکریاں اور ترقیاتی منصوبے عوام کا بنیادی حق ہیں، اسی لیے حکومت یونین کونسل کی سطح تک ‘یوتھ ایمپاورمنٹ پروگرام’ کا دائرہ کار وسیع کر رہی ہے تاکہ نوجوانوں کو روزگار کے مواقع اور وسائل کی ان کی دہلیز پر فراہمی ممکن بنائی جا سکے۔