میئر لندن صادق خان کو ٹیکس کے بغیر گاڑی رکھنے پر جرمانہ عائد

لندن کے میئر صادق خان کو ٹیکس کے بغیر گاڑی رکھنے کے ایک مقدمے میں غیر موجودگی کے دوران قصوروار قرار دیتے ہوئے جرمانے اور عدالتی اخراجات ادا کرنے کا حکم دیا گیا ہے۔ ڈرائیور اینڈ وہیکل لائسنسنگ ایجنسی (DVLA) نے 24 سال پرانی نسان مائیکرا کا ٹیکس ادا نہ کرنے پر سنگل جسٹس پروسیجر کے تحت یہ مقدمہ دائر کیا تھا، جس پر مجسٹریٹ نے صادق خان کو 220 پاؤنڈ جرمانہ، 85 پاؤنڈ عدالتی اخراجات اور 35.84 پاؤنڈ واجب الادا ٹیکس کی مد میں جمع کرانے کا حکم دیا۔ دوسری جانب سٹی ہال حکام کا کہنا ہے کہ یہ متنازع گاڑی نہ میئر کی ہے اور نہ ہی ٹرانسپورٹ فار لندن کی ملکیت ہے۔ عدالتی دستاویزات سے معلوم ہوا ہے کہ کیس کے نوٹسز صادق خان کے دفتر کے بجائے ایک ریسٹورنٹ کے پتے پر بھیجے گئے تھے، جس کے بعد ڈی وی ایل اے نے غلط اندراج کی تحقیقات اور سزا کا ازسرِ نو جائزہ لینا شروع کر دیا ہے۔