غیر قانونی حراست کا معاملہ: متعلقہ پولیس افسر کیخلاف مقدمہ درج کرنے کا حکم

لاہور ہائیکورٹ کے جسٹس امجد رفیق نے کرائم کنٹرول ڈیپارٹمنٹ (سی سی ڈی) کی جانب سے ایک شہری کو مبینہ طور پر غیر قانونی حراست میں رکھنے کے معاملے پر اہم تحریری فیصلہ جاری کرتے ہوئے ڈی پی او اوکاڑہ کو متعلقہ پولیس افسر کے خلاف فوری مقدمہ درج کرنے کا حکم دے دیا ہے۔ یہ تحریری حکم مقصودہ بی بی نامی خاتون کی درخواست پر جاری کیا گیا، جس میں موقف اپنایا گیا تھا کہ گلفام علی کو 27 جون 2026ء کو جیل سے رہائی کے فوراً بعد باہر سے سادہ لباس اہلکاروں نے دوبارہ حراست میں لے لیا تھا۔ اگرچہ سی سی ڈی انسپکٹر اختر علی نے عدالت میں رپورٹ جمع کرائی کہ گلفام علی کو اوکاڑہ کے ایک مقدمے میں باقاعدہ گرفتار کیا گیا تھا، تاہم عدالت نے دستیاب سی سی ٹی وی فوٹیج اور پولیس رپورٹ میں واضح تضاد پایا۔ جسٹس امجد رفیق نے اپنے فیصلے میں سخت آبزرویشن دی کہ کسی شہری کو غیر قانونی حراست میں رکھنا اور پھر عدالت میں گمراہ کن رپورٹ جمع کروانا ایک قابلِ دست اندازی جرم ہے، جسے کسی صورت نظر انداز نہیں کیا جا سکتا۔ عدالت نے ڈی پی او اوکاڑہ کو واقعے کے ذمہ دار پولیس افسر پر پرچہ درج کرنے اور عملدرآمد رپورٹ ہائیکورٹ میں پیش کرنے کی سخت ہدایت کی ہے۔