امریکا کا آبنائے ہرمز میں تیل کی ترسیل کیلئے خفیہ شپنگ کوریڈور قائم کرنے کا دعویٰ

واشنگٹن/دبئی: امریکی فوج نے عالمی انرجی بحران اور خطے میں جاری کشیدگی کے باوجود آبنائے ہرمز (Strait of Hormuz) کے ذریعے خام تیل کی محفوظ اور مسلسل ترسیل کے لیے ایک خفیہ ‘شپنگ کوریڈور’ (Shipping Corridor) قائم کر لیا ہے۔

امریکی نیوز ویب سائٹ ‘ایگزیوس’ (Axios) کی رپورٹ کے مطابق، دو امریکی حکام نے انکشاف کیا ہے کہ گزشتہ چند ہفتوں سے جاری اس حساس فوجی آپریشن کے تحت روزانہ رات کے وقت عمان کے ساحلی راستے (جنوبی چینل) سے 15 سے 20 تجارتی آئل ٹینکرز کو بحفاظت آبنائے ہرمز سے گزاری جا رہا ہے۔ اس اقدام کے نتیجے میں اس وقت روزانہ تقریباً 1 کروڑ (10 ملین) بیرل خام تیل عالمی مارکیٹ تک پہنچایا جا رہا ہے، جو کہ عام حالات کے حجم کا نصف ہے۔

رپورٹ کے مطابق امریکی سینٹرل کمانڈ (CENTCOM) صرف بھاری ٹینکرز کو خلیج سے باہر نکالنے تک محدود نہیں، بلکہ بحیرہ عرب سے خالی آئل ٹینکرز کو خلیجی ممالک میں داخل کرنے، تیل بھرنے اور دوبارہ بحفاظت بین الاقوامی پانیوں تک لانے کی مکمل نگرانی کر رہی ہے۔ امریکی عہدیداروں کا دعویٰ ہے کہ امریکی فوج پچھلے دو ماہ سے آبنائے ہرمز کی جنوبی بحری لین کو مکمل کنٹرول کر رہی ہے، جس کے باعث ایرانی پاسدارانِ انقلاب (IRGC) کی نگرانی کی صلاحیت کو شدید نقصان پہنچا ہے۔

اس آپریشن کی براہِ راست نگرانی امریکی ریاست نارتھ کیرولائنا کے فورٹ بریگ میں واقع ملٹری ہیڈ کوارٹر سے ‘ٹاسک فورس’ کر رہی ہے، جو خلیجی اتحادیوں کے ساتھ لمحہ بہ لمحہ رابطے میں ہے۔ یہ ٹاسک فورس روزانہ جہازوں کا شیڈول طے کرتی ہے اور رات کی تاریکی میں بننے والے ان بحری قافلوں کو امریکی فضائیہ کے جدید جیٹ طیارے، ڈرونز اور کروز میزائلوں کے خلاف فضائی و بحری چھتری (Air Cover) فراہم کرتے ہیں۔