فضل الرحمان کی محمود خان اچکزئی سے ملاقات، متحدہ اپوزیشن کے قیام کا اعلان

اسلام آباد: جمعیت علماء اسلام (جے یو آئی) کے سربراہ مولانا فضل الرحمان نے اپوزیشن لیڈر محمود خان اچکزئی سے پارلیمنٹ ہاؤس میں اہم ملاقات کے بعد ملک میں ‘متحدہ اپوزیشن’ قائم کرنے کا باضابطہ اعلان کر دیا ہے۔

تفصیلات کے مطابق، مولانا فضل الرحمان نے اپنے وفد کے ہمراہ جس میں سینیٹر کامران مرتضیٰ اور مولانا واسع شامل تھے، قومی اسمبلی میں قائدِ حزبِ اختلاف محمود خان اچکزئی سے ان کے پارلیمانی چیمبر میں ملاقات کی۔ اس موقع پر اپوزیشن اتحاد ‘تحریک تحفظِ آئینِ پاکستان’ کے رہنما اخونزادہ حسین یوسفزئی، اسد قیصر اور سینیٹ میں اپوزیشن لیڈر علامہ راجہ ناصر عباس بھی موجود تھے۔ ملاقات کے دوران ملکی سیاسی صورتحال، پارلیمانی امور اور حکومت کی مبینہ یکطرفہ پالیسیوں کے خلاف مشترکہ لائحہ عمل پر تفصیلی تبادلہ خیال کیا گیا۔

ملاقات سے قبل میڈیا سے گفتگو کرتے ہوئے مولانا فضل الرحمان نے بانی پی ٹی آئی عمران خان کی صحتیابی اور طبی سہولیات پر تشویش ظاہر کی اور کہا کہ اگر معاملے پر ان کا اختیار ہوتا تو بانی پی ٹی آئی کو ہسپتال منتقل کر کے علاج یقینی بنایا جا چکا ہوتا۔

بعد ازاں مشترکہ میڈیا ٹاک کرتے ہوئے جے یو آئی کے سربراہ نے بتایا کہ سینیٹ اور قومی اسمبلی کی اپوزیشن قيادت کے ساتھ تفصیلی مشاورت کے بعد اصولی طور پر اتفاق ہوا ہے کہ ایوان کے اندر اور باہر اپوزیشن کو ایک پیج پر آ کر مشترکہ پارلیمانی کردار ادا کرنا چاہیے۔ انہوں نے کہا کہ اس اتحاد کو مزید مستحکم بنانے کے لیے تمام اپوزیشن جماعتوں کا آل پارٹیز کانفرنس (APC) منعقد کرنے کے لیے سازگار ماحول بنایا جائے گا۔ پیپلز پارٹی کو ساتھ ملانے سے متعلق صحافی کے سوال پر مولانا فضل الرحمان نے مختصر جواب دیا کہ پیپلز پارٹی اس وقت حکومت کا حصہ ہے، لہٰذا وہ اپوزیشن اتحاد میں شامل نہیں ہو سکتی۔