شہباز شریف نے پنشنرز کیلئے ’پروف آف لائف‘ کے جدید نظام کا افتتاح کر دیا

اسلام آباد: وزیراعظم محمد شہباز شریف نے بزرگ، معذور اور سول و ملٹری پینشنرز کی سہولت کے لیے نادرا کے تیار کردہ جدید ’پروف آف لائف‘ (Proof of Life) بائیومیٹرک اور چہرے کی تصدیق والے ڈیجیٹل نظام کا باضابطہ افتتاح کر دیا ہے۔

اسلام آباد میں منعقدہ خصوصی تقریب سے خطاب کرتے ہوئے وزیراعظم شہباز شریف نے اس اقدام کو اہم پیشرفت اور انسانیت کی بہترین خدمت قرار دیا۔ انہوں نے کہا کہ ملک کی ترقی اور عوامی راحت کے لیے حکومت دن رات کوشاں ہے۔ اس جدید نظام کے فعال ہونے کے بعد اب پینشنرز کو ہر چھ ماہ بعد تصدیق کے لیے بینکوں کے چکر لگانے کی ضرورت نہیں رہے گی اور وہ گھر بیٹھے اپنے سمارٹ فون اور نادرا کی جدید ایپ کے ذریعے اپنی حیات کی تصدیق (Life Certificate) کروا سکیں گے۔

وزیراعظم نے تقریب کے دوران وزیرِ خزانہ محمد اورنگزیب، سابق وزیراعظم کے پرنسپل سیکرٹری ڈاکٹر توقیر شاہ اور بالخصوص چیئرمین نادرا کی تکنیکی کاوشوں کو سراہتے ہوئے ان کا شکریہ ادا کیا۔ انہوں نے کہا کہ بائیومیٹرک فنگر پرنٹ اور چہرے کی شناختی تکنیک (Facial Recognition) پر مبنی یہ مفت ڈیجیٹل سروس معذور، بسترِ مرگ پر موجود افراد اور زعیف پینشنرز کے لیے ایک بڑی نعمت ثابت ہوگی۔

اس موقع پر وزیرِ خزانہ نے بتایا کہ وزیراعظم کی ہدایت پر تیار کیے گئے اس نظام کا مقصد پینشن کے نظام میں شفافیت لانا اور شہریوں کو انتظامی مشکلات سے بچانا ہے۔ نئے نظام کے تحت تمام بینکوں کو ہدایت جاری کر دی گئی ہیں کہ محض فنگر پرنٹ میچ نہ ہونے کی صورت میں کسی بھی پینشنر کی رقم ہرگز نہ روکی جائے۔