چیف جسٹس لاہور ہائیکورٹ نے فل کورٹ اجلاس طلب کر لیا

 چیف جسٹس لاہور ہائیکورٹ مس عالیہ نیلم نے عدالت عالیہ کے تمام فاضل جج صاحبان کا اہم فل کورٹ اجلاس 5 ستمبر کو طلب کر لیا ہے۔

ذرائع کے مطابق چیف جسٹس عالیہ نیلم کی صدارت میں ہونے والے اس اہم اجلاس میں پرنسپل سیٹ کے علاوہ تمام علاقائی (ریجنل) بنچوں پر خدمات انجام دینے والے تمام ججز ویڈیو لنک یا بالمشافہ شرکت کریں گے۔ اجلاس کے دوران ہائیکورٹ سمیت صوبے بھر کی عدالتی کارروائیوں اور کارکردگی کا تفصیلی جائزہ لیا جائے گا۔

ذرائع نے مزید بتایا کہ فل کورٹ اجلاس میں لاہور ہائیکورٹ میں زیر التواء ہزاروں کیسز کی تیز تر سماعت اور ان کے فوری تصفیے کے لیے باضابطہ لائحہ عمل مرتب کیا جائے گا۔ اجلاس میں ججوں کی کارکردگی اور صوبے کی تمام ماتحت (سب آرڈینیٹ) عدلیہ کو درپیش انتظامی و قانونی مسائل پر بھی غوروخوض ہوگا، جبکہ سائلین کے لیے انصاف کی فراہمی میں آسانی اور جدید ‘کیس مینجمنٹ سسٹم’ کو مزید بہتر بنانے سے متعلق اہم فیصلے متوقع ہیں۔