لاہور ہائیکورٹ میں یومِ آزادی کی تقریب، چیف جسٹس عالیہ نیلم نے پرچم لہرایا

لاہور ہائیکورٹ میں 79ویں جشنِ آزادی کی مناسبت سے ایک پروقار تقریب کا انعقاد کیا گیا، جہاں چیف جسٹس لاہور ہائیکورٹ عالیہ نیلم نے عدالت عالیہ کی تاریخی عمارت پر قومی پرچم لہرایا۔ اس موقع پر پولیس کے چاق و چوبند دستے نے چیف جسٹس کو گارڈ آف آنر اور سلامی پیش کی۔ تقریب میں ہائیکورٹ کے دیگر معزز جج صاحبان، بشمول جسٹس عابد عزیز شیخ، جسٹس سید شہباز علی رضوی، جسٹس چودھری محمد اقبال، جسٹس طارق سلیم شیخ، جسٹس سید فرہاد علی شاہ، رجسٹرار راجہ قمر الزمان، عدالتی افسران اور ملازمین نے بڑی تعداد میں شرکت کی۔

پرچم کشائی کے بعد اپنے خصوصی خطاب میں چیف جسٹس عالیہ نیلم نے وطن سے محبت کو ایمان کا حصہ قرار دیتے ہوئے کہا کہ قائد اعظم کے وژن کے مطابق ملک کو مضبوط اور باوقار بنانا ہم سب کا فرض ہے۔ پنجاب کی عدلیہ کی کارکردگی پر روشنی ڈالتے ہوئے انہوں نے بتایا کہ زیر التواء مقدمات ایک بڑا چیلنج تھے، تاہم لاہور ہائیکورٹ نے سال 2025ء کے دوران تاریخی طور پر 1 لاکھ 73 ہزار سے زائد مقدمات کے فیصلے کیے، جبکہ پنجاب کی ضلعی عدلیہ نے گزشتہ دو سالوں کے دوران 80 لاکھ سے زائد مقدمات نمٹائے۔ انہوں نے ججوں اور سٹاف کی شبانہ روز محنت اور ماڈل کورٹس کی بہترین کارکردگی کو سراہتے ہوئے عزم ظاہر کیا کہ آئین کے مطابق اپنی تمام تر ذمہ داریاں پوری کی جاتی رہیں گی۔ تقریب کا اختتام ملکی سلامتی، ترقی اور خوشحالی کی خصوصی دعاؤں کے ساتھ ہوا۔