فائرنگ سے شہید پولیس اہلکاروں کی نمازِ جنازہ ادا، اعلیٰ عسکری و سول حکام کی شرکت

لاہور میں فائرنگ کے افسوسناک واقعے میں جامِ شہادت نوش کرنے والے پنجاب پولیس کے سب انسپکٹر عدیل عاشق، ہیڈ کانسٹیبل اسد اور کانسٹیبل حارث سلیم کی نماز جنازہ پولیس لائنز قلعہ گجر سنگھ میں مکمل سرکاری اعزاز کے ساتھ ادا کر دی گئی۔ نماز جنازہ میں کور کمانڈر لاہور، صوبائی وزیر خزانہ، چیف سیکریٹری پنجاب، سیکرٹری داخلہ، آئی جی پنجاب اور سی سی پی او لاہور سمیت سول و عسکری اداروں کے اعلیٰ حکام نے شرکت کی۔ اس موقع پر پولیس کے چاق و چوبند دستے نے شہدا کے جسدِ خاکی کو سلامی پیش کی، جبکہ کور کمانڈر لاہور نے چیف آف آرمی سٹاف اور چیف آف ڈیفنس فورسز کی جانب سے میتوں پر پھولوں کی چادریں چڑھائیں اور فاتحہ خوانی کی۔

نماز جنازہ کے بعد کور کمانڈر لاہور اور آئی جی پنجاب نے شہید اہلکاروں کے لواحقین سے ملاقات کی، ان سے گہرے دکھ کا اظہار کیا اور یقین دہانی کرائی کہ اس مشکل وقت میں خاندانوں کو تنہا نہیں چھوڑا جائے گا۔ پنجاب پولیس کے ترجمان کے مطابق یہ تینوں اہلکار گزشتہ شب ملزم ریحان بٹ اور اس کے ساتھیوں کی اندھا دھند فائرنگ سے شہید ہوئے تھے۔ ابتدائی تحقیقات سے معلوم ہوا ہے کہ ملزم ریحان بٹ، سب انسپکٹر عدیل عاشق کو 2024 میں سی ٹی ڈی مقابلے میں مارے جانے والے اپنے بھائی فیضان بٹ کی ہلاکت کا ذمہ دار سمجھتا تھا اور سابقہ رنجش کی بناء پر دھمکیاں دے رہا تھا۔ نماز جنازہ کی ادائیگی کے بعد تینوں شہدا کے جسدِ خاکی کو مکمل پولیس پروٹوکول کے ساتھ ان کے آبائی علاقوں میں تدفین کے لیے روانہ کر دیا گیا ہے۔