لاہور میں شہری کے نام پر 2354 گاڑیاں رجسٹرڈ ہونے کا حیران کن انکشاف

صوبائی دارالحکومت لاہور میں ٹریفک پولیس کی چیکنگ کے دوران ایک حیران کن اور غیر معمولی انکشاف سامنے آیا ہے، جہاں ایک ہی شہری کے نام پر سو، دو سو یا پانچ سو نہیں بلکہ 2 ہزار 354 موٹرسائیکلیں، رکشے اور گاڑیاں رجسٹرڈ پائی گئی ہیں۔

ہال روڈ پر جنرل ہولڈ اپ کے دوران ٹریفک اہلکاروں نے نمبر پلیٹ سے چھیڑ چھاڑ پر ایک موٹرسائیکل سوار کو روکا۔ گاڑی کے کاغذات اور ملکیت کی جانچ پڑتال کے دوران معلوم ہوا کہ محمد عثمان نامی شہری کے نام پر ہزاروں گاڑیاں رجسٹرڈ ہیں۔ مزید برآں، ان گاڑیوں پر ٹریفک قوانین کی خلاف ورزیوں پر 2 ہزار 813 ای چالان جاری کیے جا چکے ہیں۔

محکمہ ٹریفک پولیس کے مطابق مذکورہ شہری کے ذمے ای چالان کی مد میں 28 لاکھ 66 ہزار 900 روپے کا بقایا واجب الادا ہے۔ پولیس نے موٹرسائیکل کو فوری طور پر تھانہ قلعہ گجر سنگھ میں بند کر دیا ہے جبکہ اصل مالک کی نشاندہی اور تلاش کے لیے پنجاب سیف سٹیز اتھارٹی کو بھی مطلع کر دیا گیا ہے۔ سی ٹی او لاہور سید عبدالرحیم شیرازی کی ہدایت پر جعلسازوں اور نمبر پلیٹ سے چھیڑ چھاڑ کرنے والوں کے خلاف کریک ڈاؤن مزید تیز کر دیا گیا ہے۔