ن لیگی ایم پی اے ثاقب چدھڑ اور اداکارہ مومنہ اقبال تنازع کیس، لاہور ہائیکورٹ نے سماعت 6 اکتوبر تک ملتوی کر دی

لاہور ہائیکورٹ میں ن لیگ کے ایم پی اے ثاقب چدھڑ اور معروف اداکارہ مومنہ اقبال (درخواست میں درج نام رمشا اقبال) کے درمیان تنازع اور 80 لاکھ روپے کی خرد برد کے مقدمے کے اندراج سے متعلق کیس کی سماعت ہوئی۔ عدالت نے فریقین کی استدعا پر کیس کی سماعت 6 اکتوبر تک کے لیے ملتوی کر دی ہے۔

عدالت میں سماعت کے دوران ایم پی اے ثاقب چدھڑ کے وکیل میاں علی اشفاق اسلام آباد ہائیکورٹ میں مصروفیت کے باعث پیش نہیں ہو سکے، جس پر جسٹس عبہر گل نے رمشا اقبال کی جانب سے دائر کردہ درخواست پر سماعت کو آگے بڑھا دیا۔

درخواست گزار کی جانب سے موقف اختیار کیا گیا کہ ثاقب چدھڑ نے 80 لاکھ روپے امانت میں خیانت کرنے کا جھوٹا مقدمہ درج کرانے کی درخواست دی تھی، اور جسٹس آف پیس نے فریقین کا موقف سنے بغیر ہی جلدی میں مقدمہ درج کرنے کا حکم صادر کر دیا تھا۔ عدالت سے استدعا کی گئی ہے کہ جسٹس آف پیس کے اس فیصلے کو کالعدم قرار دیا جائے۔ یاد رہے کہ لاہور ہائیکورٹ نے اس سے قبل 80 لاکھ روپے کی خرد برد پر مقدمہ درج کرنے کے حکم کو معطل کرنے کا حکم امتناعی جاری کر رکھا ہے، اور اب آئندہ تاریخ پر وکلا کے دلائل کے بعد مزید کارروائی کی جائے گی۔