لاہور جنرل ہسپتال کے گائنی وارڈ میں آگ بھڑک اٹھی

لاہور: لاہور کے جنرل ہسپتال کے گائنی وارڈ میں اچانک آگ بھڑک اٹھی، جس کے نتیجے میں بھگڈر مچ گئی تاہم ریسکیو اور ہسپتال عملے نے بروقت کارروائی کرتے ہوئے تمام مریضوں کو باحفاظت باہر نکال لیا۔

ذرائع کے مطابق آگ وارڈ کی چھت میں نصب وائرنگ میں شارٹ سرکٹ کے باعث لگی۔ واقعے کے فوراً بعد ہسپتال کے سیکیورٹی اور ریسکیو عملے نے ہنگامی بنیادوں پر تحرک کرتے ہوئے حاملہ خواتین، نو مولود بچوں اور ان کے لواحقین سمیت 70 سے زائد افراد کو فوری طور پر عمارت سے باہر محفوظ مقام پر منتقل کر دیا۔

ہسپتال انتظامیہ نے بتایا کہ فائر بریگیڈ کی گاڑیوں نے موقع پر پہنچ کر آگ پر قابو پالیا، جس سے بڑا نقصان ہونے سے بچ گیا۔ تاہم آگ بجھانے کی کارروائی کے دوران دھویں کے باعث ہسپتال کا ایک گارڈ بے ہوش ہو گیا۔ انتظامیہ کے مطابق متاثرہ گارڈ کو لاہور جنرل ہسپتال کی ایمرجنسی میں فوری طبی امداد فراہم کی جا رہی ہے اور اس کی حالت مکمل طور پر خطرے سے باہر ہے۔