کویت کی ایرانی حملوں کی شدید مذمت، خطے میں امن کیلئے خطرناک قرار دیدیا

کویت کی وزرا کونسل (کابینہ) نے ایران کی جانب سے ملک کو نشانہ بنانے والے حملوں کی شدید الفاظ میں مذمت کرتے ہوئے انہیں خلیجی خطے کے امن و استحکام کے لیے انتہائی خطرناک پیش رفت قرار دیا ہے۔ سرکاری خبر رساں ادارے کے مطابق کویتی کابینہ کے اہم اجلاس کے بعد جاری ہونے والے باضابطہ بیان میں کہا گیا کہ ایران کے یہ حملے خطے میں کشیدگی کو سنگین حد تک بڑھانے کا باعث ہیں، جو نہ صرف کویت بلکہ پورے خلیج کی سلامتی اور استقرار کے لیے براہ راست بڑا خطرہ ہیں۔

کویتی حکومت نے اپنے عزم کا اعادہ کرتے ہوئے کہا کہ ملک اپنی خودمختاری، قومی سلامتی اور اپنے شہریوں کے تحفظ پر کسی بھی قسم کا سمجھوتہ نہیں کرے گا، اور ملکی دفاع کو ہر قیمت پر یقینی بنانے کے لیے تمام لازم و ضروری اقدامات کیے جائیں گے۔ اس کے ساتھ ہی کویت نے عالمی برادری سے زوردار مطالبہ کیا ہے کہ وہ خطے میں بڑھتی ہوئی کشیدگی کو روکنے، بین الاقوامی قوانین کی پاسداری یقینی بنانے اور امن کے قیام کے لیے اپنا مؤثر اور فوری کردار ادا کرے۔