ویرات کوہلی ٹریوس ہیڈ سے ہاتھ ملائے بغیر گزر گئے، سوشل میڈیا پر شدید تنقید

بھارتی کرکٹ اسٹار ویرات کوہلی ایک بار پھر سوشل میڈیا پر تنقید کی زد میں آ گئے ہیں جب انہوں نے آئی پی ایل 2026 کے ایک میچ کے بعد آسٹریلوی بیٹر ٹریوس ہیڈ سے ہاتھ ملانے سے گریز کیا۔

یہ واقعہ حیدرآباد میں کھیلے گئے میچ کے اختتام پر پیش آیا، جہاں دونوں ٹیموں کے کھلاڑی روایتی ہینڈ شیک لائن میں موجود تھے۔ اس موقع پر ویرات کوہلی نے پیٹ کمنز اور ابھشیک شرما سے مصافحہ کیا، تاہم وہ ٹریوس ہیڈ کے سامنے سے بغیر ہاتھ ملائے آگے بڑھ گئے، جبکہ ٹریوس ہیڈ نے ہاتھ آگے بڑھا رکھا تھا۔

میچ کے دوران دونوں کھلاڑیوں کے درمیان کچھ جملوں کا تبادلہ بھی دیکھنے میں آیا تھا، تاہم اس مبینہ تنازع کی اصل وجہ واضح نہیں ہو سکی۔

واقعے کی ویڈیو سوشل میڈیا پر وائرل ہونے کے بعد صارفین نے کوہلی کے رویے پر سخت ردعمل دیا۔ متعدد صارفین نے اسے غیر ضروری غرور اور غیر اسپورٹس مین رویہ قرار دیا، جبکہ بعض نے اسپورٹس مین اسپرٹ پر سوال اٹھایا۔

میچ میں ویرات کوہلی بیٹنگ میں بھی خاطر خواہ کارکردگی نہ دکھا سکے اور صرف 15 رنز بنا کر آؤٹ ہو گئے۔ دوسری جانب سن رائزرز حیدرآباد نے 255 رنز اسکور کیے جبکہ رائل چیلنجرز بنگلورو کی ٹیم 200 رنز تک محدود رہی۔