اردن کے شاہ عبداللّٰہ دوم کو اعلیٰ ترین سول ایوارڈ نشانِ پاکستان سے نوازا گیا

اسلام آباد: ایوانِ صدر میں منعقدہ پروقار تقریب میں اردن کے شاہ عبداللّٰہ دوم کو پاکستان کا اعلیٰ ترین سول ایوارڈ نشانِ پاکستان عطا کردیا گیا۔ تقریب کا آغاز دونوں ممالک کے قومی ترانوں سے ہوا، جبکہ صدرِ مملکت آصف علی زرداری اور وزیرِ اعظم شہباز شریف بھی اس موقع پر موجود تھے۔

اعلامیے کے مطابق صدر آصف علی زرداری نے شاہ عبداللّٰہ دوم کو نشانِ پاکستان سے نوازا، جب کہ شاہ عبداللّٰہ دوم نے صدرِ پاکستان کو اردن کا اعلیٰ ترین اعزاز “وسامُ النَّہضہ المرصّع” پیش کیا۔ یہ ایوارڈ سربراہانِ مملکت اور ممتاز عالمی شخصیات کو دیا جاتا ہے، اور صدرِ پاکستان کو دیا گیا اعزاز اردن کی جانب سے پاکستان کے ساتھ گہرے احترام اور دیرینہ دوستی کا اظہار ہے۔

شاہ عبداللّٰہ دوم کو یہ اعزاز دو طرفہ تعلقات مستحکم بنانے، اور علاقائی و عالمی امن کے لیے خدمات کے اعتراف میں دیا گیا۔ تقریب میں فیلڈ مارشل سید عاصم منیر، ایئر چیف مارشل ظہیر احمد بابر سدھو، ایڈمرل نوید اشرف، وفاقی وزراء، سفیروں اور کابینہ کے ارکان نے بھی شرکت کی۔

پیپلز پارٹی کے چیئرمین بلاول بھٹو زرداری اور خاتونِ اوّل آصفہ بھٹو زرداری بھی تقریب میں شریک تھیں۔