بلوچستان کے ضلع خضدار میں زلزلے کے جھٹکے، شدت 4.5 ریکارڈ

بلوچستان کے ضلع خضدار اور اس کے گرد و نواح میں شدید زلزلے کے جھٹکے محسوس کیے گئے ہیں۔ زلزلہ پیما مرکز کے مطابق خضدار میں آنے والے زلزلے کی شدت ریختر اسکیل پر 4.5 ریکارڈ کی گئی، جبکہ زمین میں اس کی گہرائی 30 کلو میٹر تھی۔ زلزلہ پیما مرکز نے مزید بتایا کہ زلزلے کا مرکز خضدار شہر سے تقریباً 45 کلو میٹر مشرق میں واقع تھا۔

زلزلے کے جھٹکے محسوس ہوتے ہی شہریوں میں شدید خوف و ہراس پھیل گیا اور لوگ کلمۂ طیبہ اور استغفار کا ورد کرتے ہوئے فوری طور پر اپنے گھروں، دفاتر اور دکانوں سے باہر کھلی جگہوں پر جمع ہو گئے۔ تاہم، ابتدائی اطلاعات کے مطابق حادثے میں کسی جانی یا مالی نقصان کی اطلاع موصول نہیں ہوئی ہے۔