افغان طلبہ سے یکجہتی محبت سے زیادہ سیاسی رجحانات کی عکاس ہے:خواجہ آصف

وفاقی وزیرِ دفاع خواجہ آصف نے افغان طلبہ سے اظہارِ یکجہتی کرنے والے پاکستانی طلبہ کے طرزِ عمل پر سخت ردِعمل کا اظہار کرتے ہوئے کہا ہے کہ یہ یکجہتی محبت سے زیادہ ان کے مخصوص سیاسی رجحانات کی عکاسی کرتی ہے۔ سماجی رابطے کی ویب سائٹ ‘ایکس’ (سابقہ ٹوئٹر) پر جاری اپنے بیان میں وزیرِ دفاع نے کہا کہ پاکستان نے گزشتہ 5 دہائیوں تک افغان شہریوں کی میزبانی کی اور اپنے محدود وسائل میں انہیں شریک کیا، تاہم نیٹو افواج کے انخلا کے بعد امن کی توقعات کے برعکس پاکستان کی مساجد، اسکولوں، بازاروں اور سیکیورٹی فورسز پر حملوں میں افغان شہری ملوث پائے گئے ہیں۔

خواجہ آصف نے انکشاف کیا کہ سول و فوجی قیادت کے افغان حکام سے مسلسل رابطوں کے باوجود ان کی معاندانہ روش میں کمی نہیں آئی۔ انہوں نے پاکستانی طلبہ پر زور دیا کہ وہ کسی سیاسی جماعت کی محبت میں اس حد تک نہ جائیں کہ انہیں اپنے وطن کے شہداء کا خون سستا لگنے لگے۔ انہوں نے تجویز دی کہ افغانوں سے یکجہتی جتانے والے طالب علم خیرسگالی کے طور پر خود کسی افغان درسگاہ میں تعلیم حاصل کرنے کی کوشش کریں۔ واضح رہے کہ یہ بیان ایک ایسے وقت میں سامنے آیا ہے جب افغان طلبہ کی پاکستان میں تعلیم کا معاملہ عدالت میں زیرِ بحث ہے، جہاں وزارتِ خارجہ نے قانونی ویزا اور ڈگری کے حامل طلبہ کو تعلیم مکمل کرنے کی اجازت دی ہے، جبکہ لاہور ہائیکورٹ نے افغان میڈیکل طلبہ کی واپسی سے متعلق پی ایم ڈی سی (PMDC) کی ہدایات پر حکمِ امتناع برقرار رکھا ہوا ہے۔